முக்கிய அறிவிப்பை வெளியிட்ட கமல்ஹாசன்... ரசிகர்கள் மகிழ்ச்சி!
இயக்குனர் மணிரத்னம் இயக்கத்தில் கமல்ஹாசன் நடித்து வரும் திரைப்படம் ''தக்லைஃப்’', இப்படத்தின் படப்பிடிப்பு ஏற்கனவே முடிந்துவிட்ட நிலையில், தற்போது இந்த படத்தின் முக்கிய அறிவிப்பை நடிகர் கமல்ஹாசன் தனது சமூக வலைதளத்தில் வெளியிட்டுள்ளார். இதனால் அவரது ரசிகர்கள் மகிழ்ச்சி அடைந்துள்ளனர்.
நீண்ட இடைவெளிக்கு பிறகு கமல்ஹாசன் மற்றும் மணிரத்னம் இணைந்துள்ள ''தக்லைஃப்'’ படத்திற்கு மக்களிடையே மிகப்பெரிய எதிர்பார்ப்பு ஏற்பட்டுள்ள நிலையில், இந்த படத்தின் படப்பிடிப்பு சென்னை, டெல்லி, ரஷ்யா, புதுச்சேரி உள்ளிட்ட பல இடங்களில் நடைபெற்றது.
அடுத்த ஆண்டு ஏப்ரலில் படம் வெளியாகும் என தகவல்கள் வெளியாகியுள்ளன. இந்நிலையில், கமல்ஹாசன் தனது பிறந்த நாளான நவம்பர் 7 ஆம் தேதி காலை 11 மணிக்கு 'தக்லைஃப்’ படத்தின் முக்கிய அறிவிப்பை வெளியிட உள்ளதாக அறிவித்துள்ளார். அனேகமாக இந்த படத்தின் ரிலீஸ் தேதி குறித்து அதிகாரப்பூர்வ அறிவிப்பு அல்லது பர்ஸ்ட் சிங்கிள் குறித்த அறிவிப்பு வெளியாகலாம் என்று எதிர்பார்க்கப்படுகிறது.
ரவி கே சந்திரன் ஒளிப்பதிவில் ஸ்ரீகர் பிரசாத் படத்தொகுப்பில் தயாராகி வரும் இந்த படத்தை கமல்ஹாசனின் ராஜ்கமல் இன்டர்நேஷனல் நிறுவனம், மெட்ராஸ் டாக்கீஸ் நிறுவனம் மற்றும் ரெட் ஜெயண்ட் மூவிஸ் போன்ற நிறுவனங்கள் இணைந்து தயாரிக்கின்றன. கமல்ஹாசன், சிலம்பரசன், த்ரிஷா, அபிராமி, நாசர், அலி ஃபைசல், பங்கஜ் திரிபாதி, அசோக் செல்வன், ஜோஜு ஜார்ஜ், ஐஸ்வர்யா லட்சுமி, வையாபுரி உள்ளிட்ட பலர் நடிக்கும் இந்த படத்திற்கு இசைப்புயல் ஏ.ஆர்.ரஹ்மான் இசையமைத்து வருகிறார்.
