‘கங்குவா’ படத்துடன் வெளியாகும் கார்த்தி பட அப்டேட்

 பெரும் எதிர்பார்ப்பில் இருக்கும் சூர்யா நடித்துள்ள ‘கங்குவா’, திரைப்படம் நவம்பர் 14-ம் தேதி வெளியாக இருக்கிறது. பல்வேறு மொழிகளில் வெளியாகவுள்ள இப்படத்தை சூர்யா கேரளா, ஆந்திரா என விளம்பரம் செய்து வருகிறார். இப்படத்துடன் கார்த்தி நடித்து உருவாகி வரும் ‘வா வாத்தியார்’ டீசரை வெளியிட படக்குழு முடிவு செய்திருக்கிறது.

1 நிமிடம் 38 விநாடிகள் கொண்ட ‘வா வாத்தியார்’ டீசர் கங்குவா இடைவேளையில் வெளியாக உள்ளது. பெரும் பொருட்செலவில் நீண்ட நாட்களாக தயாரிப்பில் இருக்கும் இப்படத்தின் டீசர் வெளியாக இருப்பதால் படக்குழுவினர் பெரும் மகிழ்ச்சியில் இருக்கிறார்கள்.

நலன் குமாரசாமி இயக்கத்தில் கார்த்தி, கீர்த்தி ஷெட்ட், சத்யராஜ், ராஜ்கிரண் உள்ளிட்ட பலர் நடித்துள்ள படம் ‘வா வாத்தியார்’. சந்தோஷ் நாராயணன் இசையமைத்து வரும் இப்படத்தை அடுத்த ஆண்டு பிப்ரவரியில் வெளியிட படக்குழு முடிவு செய்திருக்கிறது.