கர்ப்ப காலங்களில் யாருக்கெல்லாம் நீரிழிவு நோய் வரும் என்பதை தெரிந்து கொள்வோம் !!!!

கர்ப்பக்காலத்தில் கர்ப்பிணி பெண்களின் உடல் நிலை, வாழ்க்கை முறை, உணவு முறை இதையெல்லாம் பொறுத்தே உடலின் ஆரோக்கிய நிலைகளிலும் பல்வேறு குறைபாடுகள் வருகிறது.

பெரும்பாலும் கர்ப்பக்கால நோய்களை கவனத்துடன் இருந்தால் பெருமளவு தவிர்த்துவிடமுடியும் என்றாலும் சிலர் இந்த உபாதையை சந்திப்பதும் தவிர்க்கமுடியாததாகிவிடுகிறது.

எனினும் கர்ப்பக்காலத்தில் உண்டாகும் நீரிழிவு யாருக்கெல்லாம் வருவதற்கு வாய்ப்பு இருக்கிறது என்பதை தெரிந்துகொண்டால் அதை பெருமளவு வராமல் தவிர்த்துவிட முடியும். இது குறித்து பார்க்கலாம்.

                

           

இன்று உலகளவில் அதிக மக்கள் உபாதைகுள்ளாகும் நீரிழிவு நோய்க்கு காரணம் பரம்பரையாகவும் வரலாம் என்பதுதான். அந்த வகையில் கர்ப்பக்காலத்தில் நீரிழிவு வருவதற்கு காரணங்கள் பலவாக இருந்தாலும் கர்ப்பிணி பெண்ணின் பெற்றோருக்கு நீரிழிவு இருந்தால் அது இவர்களையும் தாக்க கூடும்.

அப்படியெனில் கர்ப்பிணிபெண்களின் முன்னோர்களுக்கு நீரிழிவு வந்தால் இவர்களுக்கு கட்டாயம் நீரிழிவு வரும் என்று அர்த்தம் அல்ல. ஆனால் கர்ப்பக்காலத்தில் உணவு கட்டுப்பாடு இல்லாமல் கவனக்குறைவாக இருக்கும் போது நீரிழிவு வருவதற்கான வாய்ப்புகள் அதிகரிக்கும்.

கருவுற்ற பிறகு 4 ஆம் மாதங்களுக்கு பிறகே நீரிழிவுக்கான உபாதை உண்டாகும் என்றாலும் ஆரம்பகட்டத்திலேயே நீரிழிவு வராமல் தடுக்க மருத்துவரின் ஆலோசனை பெறுவதோடு அதை ச ரியாக பின்பற்றினாலே பெருமளவு நீரிழிவு வராமல் தடுத்துவிடமுடியும்.

​தாமதமாக கருத்தரிப்பது:

பெண்கள் திருமண வயது என்பது பூப்படைதலுக்கு பிந்தைய குறிப்பிட்ட வருடங்களுக்குள் ( 10 முதல் 12 வருடங்களுக்குள்) நடைபெற வேண்டும். அதே போன்று திருமணத்துக்கு பிறகும் உரிய வயதில் குழந்தை பெற்று கொள்வதையும் தள்ளிபோட கூடாது.

இளவயதில் உடல் வலுவாக இருக்கும். உறுப்புகள் தங்கள் பணியை தொய்வில்லாமல் செய்யும். ஆனால் 30 வயதுக்கு பிறகு குழந்தை பெற திட்டமிடுவதும், தாமதமான திருமணமும், தாமதமான கருத்தரிப்பும் நீரிழிவு உண்டாவதற்கான வாய்ப்பை கூட்டிவிடும்.

உரிய வயதில் திருமணம் செய்துகொள்வதும் குழந்தைப்பேறை குறிப்பிட்ட வயதுக்குள் பூர்த்தி செய்துகொள்வதும் அவசியம். எதிர்பாராத விதமாக தாமதமாக திருமணப்பேறு நடந்தால் கருவுற்ற நாள் முதலே மருத்துவரின் ஆலோசனை படி கருவின் ஆரோக்கியத்துக்கு வேண்டிய வாழ்க்கை முறை உணவு முறையை பின்பற்றினாலே போதுமானது.

இன்று பெரும்பாலனவர்களின் தலையாய பிரச்னையே உடல்பருமன் தான். அதிக உடல்பருமன் சமயங்களில் குழந்தை பெறுவதிலேயே சிக்கலை உண்டாக்கிவிடும் என்பது குறிப்பிடத்தக்கது. கர்ப்பக்காலத்தில் உடல் எடை கருவின் வளர்ச்சிக்கேற்ப அதிகரிப்பது இயல்பானது என்றாலும் அவை ஒவ்வொரு மாதங்களிலும் அளவாக ஏற்றம் காணவேண்டும்.

குறிப்பாக கருவளர்ச்சி அடையும் 6 ஆம் மாதத்துக்கு பிந்தைய உடல் எடை அதிகரிப்பு என்பது சரியானது. அதுவும் அளவாக இருக்கவேண்டும். ஆனால் கருவுற்ற பிறகு வயிற்றில் குழந்தையின் வளர்ச்சியை அதிகரிக்க என்று எடுத்துகொள்ளும் அதிகப்படியான ஊட்டச்சத்துகள் உடல் பருமனை உண்டாக்கிவிடும். கூடுதலாக நீரிழிவுக்கான வாய்ப்பையும் அதிகரித்துவிடும்.

உயரத்துகேற்ற எடையை தாண்டி இருக்கும் பெண்கள் கருவுற்ற உடன் உடல் எடையை குறைக்க முயற்சிக்க வேண்டாம். அதே நேரம் இருக்கும் எடை அதிகரிக்காமல் பார்த்துகொள்வதும் முக்கியம். இருக்கும் உடல் எடைக்கேற்ப கர்ப்பக்கால எடையும் இருக்கும்படி பார்த்துகொள்ள வேண்டும். குறிப்பாக உடல் ஆரோக்கியம் குறையாத ஊட்டச்சத்தான உணவுகளோடு.

​முதல் கர்ப்பத்தின் நீரிழிவு:

முதல் கர்ப்பத்தின் போது நீரிழிவு பிரச்சனைக்கு உள்ளாகும் கர்ப்பிணிகள் பிரசவத்துக்குப் பிறகு நீரிழிவு இயல்பாக இருக்கும். பிறகு இரண்டாவது முறை கர்ப்பம் தரிக்கும் போதும் கவனமாக இருந்தாலும் நீரிழிவு வருவதற்கான வாய்ப்புகள் உண்டாகவே செய்யும். எனினும் முதல் கர்ப்பத்தின் அவஸ்தையை உணர்ந்து பெருமளவு இவர்களே கட்டுக்குள் வைத்திருக்கவும் முயலுவார்கள்.

முதல் கர்ப்பத்தில் நீரிழிவு பிரச்சனையை சந்தித்தால் இரண்டாவது கர்ப்பத்தின் போது கருவுற்ற நாள் முதலே உணவு முறையில் கட்டுப்பாடும், மென்மையான உடற்பயிற்சியும் கூடுதல் கவனமும் இருந்தால் நீரிழிவு பெருமளவு தவிர்த்துவிடவும் முடியும்.

கர்ப்பக்காலத்தில் நீரிழிவு வராமல் தடுக்க என்னவெல்லாம் செய்யலாம் என்பது குறித்து ஏற்கனவே கொடுத்திருக்கிறோம். சுருக்கமாக பார்த்தால் கர்ப்பக்காலத்தில் ஹார்மோன் சுரப்பு உண்டாகும் மாற்றத்தால் செல்களால் இன்சுலின் அளவை போதுமான அளவு பயன்படுத்தமுடியாமல் போவதே இதற்கு காரணம்.

இந்நிலையில் வாழ்க்கை முறையிலும், உணவு பழக்கத்திலும் அலட்சியம் செய்யும் போது பாதிப்பு வேகமெடுக்க வாய்ப்பு அதிகமுண்டு. அதே நேரம் குழந்தையின் வளர்ச்சி போதுமான அளவு இருக்க அதிகப்படியான ஆற்றலை செல்கள் உற்பத்தி செய்ய வேண்டியிருக்கிறது இதனால் தான் இன்சுலின் தேவையும் அதிகமாகிறது.

அதற்காக நீரிழிவு வந்துவிட்டால் அவதிபடவேண்டியதில்லை. ஆரம்பத்திலேயே மருத்துவரின் வழிகாட்டுதலுடன் சரிவிகிதமான உணவு மூலம் இன்சுலின் சுரப்பை சீராக்கி கொள்ள முயற்சிக்க வேண்டும். அவ்வபோது உரிய இடைவேளையில் ரத்தத்தில் சர்க்கரை அளவு குறித்த பரிசோதனையும் மேற்கொள்ள வேண்டும். ஆரோக்கியமான உணவு, சீரான உடல் உழைப்பு, போதுமான ஓய்வுஇவையெல்லாம் சரியாக கடைபிடித்தால் பேறுகாலம் சுகமான பொற்காலமே.