இங்கிலாந்து விக்கெட்டுகளை வீழ்த்த திணறும் பாகிஸ்தான்

பாகிஸ்தானுக்கு எதிரான 2வது டெஸ்டின் முதல் இன்னிங்சில் இங்கிலாந்து கேப்டன் அலெஸ்டர் குக், ஜோ ரூட் சதமடித்தனர். இங்கிலாந்து சென்றுள்ள பாகிஸ்தான் அணி, 4 போட்டிகள் கொண்ட டெஸ்ட் தொடரில் பங்கேற்கிறது. முதல் டெஸ்டில் பாகிஸ்தான் வென்றது. இரண்டாவது டெஸ்ட் மான்செஸ்டர் நகரில் நேற்று துவங்கியது. டாஸ் வென்ற இங்கிலாந்து அணி, பேட்டிங் தேர்வு செய்தது. இங்கிலாந்து அணிக்கு அலெக்ஸ் ஹேல்ஸ் (10) ஏமாற்றினார். பின் இணைந்த கேப்டன் அலெஸ்டர் குக், ஜோ ரூட் ஜோடி பாகிஸ்தான் பந்துவீச்சை எளிதாக சமாளித்தது. அபாரமாக ஆடிய குக், டெஸ்ட் அரங்கில் தனது 29வது சதத்தை பதிவு செய்தார். இரண்டாவது விக்கெட்டுக்கு 185 ரன்கள் சேர்த்த போது முகமது ஆமிர் வேகத்தில் குக் (105) அவுட்டானார். தொடர்ந்து அசத்திய ஜோ ரூட் தனது 10வது சதமடித்தார். ஜேம்ஸ் வின்ஸ் (18), கேரி பேலன்ஸ் (23) சோபிக்கவில்லை.  முதல் நாள் முடிவில் முதல் இன்னிங்சில் இங்கிலாந்து அணி 4 விக்கெட்டுக்கு 314 ரன்கள் எடுத்திருந்தது. ரூட் (141), வோக்ஸ் (2) அவுட்டாகாமல் இருந்தார். பாகிஸ்தான் சார்பில் முகமது ஆமிர், ரஹாத் அலி தலா 2 விக்கெட் வீழ்த்தினர்